நீங்கள் தேடியது "மக்கள் வெளியேற்றம்"

மாண்ட்ரியல்:

வடஅமெரிக்க நாடான கனடாவின் கிழக்கு பகுதியில் கடந்த சில நாட்களாக தொடர்ந்து மழைபெய்து வருகிறது. உறைந்து கிடந்த பனியும் உருகத்தொடங்கியது.

இதன் காரணமாக கியூ பெக் மற்றும் நியூ புரூன்ஸ்விக் ஆகிய பகுதியில் வெள்ளப்பெருக்கு ஏற்பட்டுள்ளது. இதனால் கியூபெக் பகுதியில் ஓடும் செயின்ட் லாரன்ஸ் ஆற்றின் கடை உடைந்து ஊருக்குள் வெள்ளம் புகுந்தது.

இதனால் ஒட்டாவா, பியூஸ், கியூபிக் நகரங்களில் வாழும் மக்கள் வெளியேற்றப்பட்டனர். சுமார் 1500 பேர் பாதுகாப்பான இடங்களில் தங்கவைக்கப்பட்டனர்.

வெள்ளம் பாதித்த பகுதியில் ராணுவ வீரர்கள் மீட்பு பணியில் ஈடுபடுத்தப்பட்டனர். நியூபெக்கில் மட்டும் 200 ராணுவ வீரர்களும், ஒட்டாவாவில் 400 பேரும் முகாமிட்டுள்ளனர். இவை தவிர நியூ புரூன்ஸ்விக்கில் 120 கூடுதல் ராணுவ வீரர்கள் நிறுத்தி வைக்கப்பட்டுள்ளனர்.

ஒட்டாவாவில் மழை வெள்ளத்தில் சிக்கி ஒருவர் உயிரிழந்தார். அவரது காரும் வெள்ளத்தில் அடித்து செல்லப்பட்டது. #CanadaFlooding

வாஷிங்டன்:

அமெரிக்காவின் வடக்கு கலிபோர்னியாவில் காட்டுத்தீ வேகமாக பரவி வருகிறது. கேம்ப் கிரீக் என்ற இடத்தில் தொடங்கிய இந்த காட்டுத்தீயானது கொளுந்து விட்டு எரிகிறது. மணிக்கு 50 மைல் வேகத்தில் பலத்த காற்று வீசுவதால் சில மணி நேரத்திலேயே (நேற்று முன்தினம் மதியம் வரை) 20 ஆயிரம் ஏக்கர் நிலப்பரப்பில் காட்டுத்தீ பரவி விட்டது. அந்தப் பகுதி முழுவதும் புகை மண்டலமாக மாறி உள்ளது.

இந்த காட்டுத்தீ திடீரென பரவியதால் பலர் வாகனங்களையெல்லாம் சாலைகளில் போட்டு விட்டு ஓட்டம் பிடித்ததாக தகவல்கள் கூறுகின்றன. பல வீடுகள் தீக்கிரையாகி விட்டதாகவும் சொல்லப்படுகிறது.



தீ பரவி வருகிற பகுதிகளில் குடியிருந்த ஆயிரக்கணக்கான மக்கள் வீடுகளை காலி செய்து விட்டு பாதுகாப்பான இடங்களுக்கு செல்ல தொடங்கி உள்ளனர். அங்கு பாரடைஸ், மகாலியா, கான்கவ், பட்டி கிரீக் கேனியான், பட்டி வேலி பகுதிகளில் உள்ள மக்கள் வீடுகளை விட்டு வெளியேறி பாதுகாப்பான இடங்களுக்கு சென்று விடுமாறு அரசு அதிகாரிகள் உத்தரவிட்டுள்ளனர். பள்ளிகள், மருத்துவமனைகளில் இருந்தவர்கள் எல்லாரும் வெளியேற்றப்பட்டுள்ளனர். இந்த காட்டுத்தீயில் சிக்கி சிலர் உயிரிழந்து விட்டதாகவும் உறுதிபடுத்தப்படாத தகவல்கள் கூறுகின்றன. தீயை அணைப்பதற்கு நூற்றுக்கணக்கான வீரர்கள் போராடி வருகின்றனர்.

தீ பரவி வருகிற பகுதியில் சிக்கியுள்ள மக்களை மீட்கும் பணியில் நெருக்கடி கால பணியாளர்கள் ஈடுபட்டுள்ளனர். மின் இணைப்பு துண்டிக்கப்பட்டுள்ளதால் சாக்ரமண்டோ நகருக்கு வடக்கேயுள்ள பகுதிகளில் பல்லாயிரக்கணக்கானோர் மின்சாரம் இன்றி இருளில் தவிக்கின்றனர்.  #California #Wildfire 

வாஷிங்டன்:

அமெரிக்காவின் மெக்சிகோ வளைகுடா பகுதியில் புயல் மையம் கொண்டு இருந்தது. அந்த புயலுக்கு ‘மைக்கேல்’ என்று பெயர் சூட்டி இருந்தனர்.

அது, புளோரிடா மாகாணத்தை நோக்கி நகர்ந்து வந்தது. இந்திய நேரப்படி நேற்று நள்ளிரவு அமெரிக்காவை புயல் தாக்கியது.

முதலில் புளோரிடா மாகாணத்தை தாக்கிய புயல் பின்னர் அலபாமா, ஜார்ஜியா மாகாணங்களையும் தாக்கியது. மணிக்கு 200-ல் இருந்து 240 கிலோ மீட்டர் வேகத்தில் பயங்கர சூறாவளி காற்று வீசியது.

அத்துடன் பலத்த மழையும் பெய்தது. சூறாவளியால் கடலிலில் கொந்தளிப்பு ஏற்பட்டது. வழக்கத்தை விட 12 அடி உயரத்துக்கு ராட்ச அலைகள் எழுந்து வந்தன. இதனால் பல இடங்களில் நிலப்பரப்புக்குள் தண்ணீர் புகுந்தது.

மழைநீர் மற்றும் கடல் நீரால் புளோரிடா நகரம் மற்றும் அதனை சுற்றி உள்ள பகுதிகளில் வெள்ளம் ஏற்பட்டது.

பல இடங்களில் குடியிருப்பு பகுதிகளை வெள்ளம் சூழ்ந்து இருக்கிறது. அங்கிருந்து மக்கள் வெளியேற முடியாமல் தவிக்கிறார்கள்.

அமெரிக்காவில் மரத்தினால் கட்டப்பட்ட வீடுகள் அதிகமாக உள்ளன. சூறை காற்றினால் இவை கடுமையாக சேதம் அடைந்துள்ளன. பல வீடுகளை சூறாவளி காற்று முற்றிலும் இழுத்து சென்று விட்டது.

கடலில் நிறுத்தப்பட்டு இருந்த படகுகள் கொந்தளிப்பில் சிக்கி கரைக்கு இழுத்து வரப்பட்டன. அவற்றில் பல படகுகள் உடைந்து சேதம் அடைந்து ஆங்காங்கே கடலில் மிதக்கின்றன.

புயலால் 3 லட்சம் பேர் பாதிக்கப்பட்டுள்ளதாக அமெரிக்க அரசு கூறி உள்ளது.

மின்சாரம் இல்லாததால் 5 லட்சத்துக்கும் மேற்பட்டோர் தவித்து வருகிறார்கள். புயல் பாதிப்பு அதிகமாக இருப்பதால் பள்ளி, கல்லூரிகள், அரசு அலுவலகங்களுக்கு இந்த வாரம் முழுவதும் விடுமுறை அளிக்கப்பட்டுள்ளது.

மழை மற்றும் புயலில் சிக்கி 13 பேர் இறந்துள்ளனர். நூற்றுக்கணக்கானோர் காயம் அடைந்துள்ளனர்.

கடந்த 100 ஆண்டுகளில் அமெரிக்காவை தாக்கியதில் இதுதான் அதிசக்தி வாய்ந்த புயல் என்று நிபுணர்கள் கூறினார்கள்.

தொடர்ந்து புயல் நிலப்பரப்புக்குள் பயணித்து வருகிறது. இதனால் இன்றும் பல பகுதிகளில் இதன் தாக்கத்தால் பாதிப்பு ஏற்படும் என்று எச்சரித்து உள்ளனர். #HurricaneMichael

கிவ்:

உக்ரைன் நாட்டில் வட செர்னிகிவ் பகுதியில் டிருஷ்பா என்ற கிராமத்தில் ராணுவ ஆயுத கிடங்கு உள்ளது. இது 1700 ஏக்கர் நிலப்பரப்பில் அமைந்துள்ளது.

அங்கு நேற்று திடீரென தீவிபத்து ஏற்பட்டது. 6-வது பிரிவு ஆயுத கிடங்கில் ஏற்பட்ட தீ விபத்தால் அங்கிருந்த வெடி பொருட்கள் வெடித்து சிதறின. ஒரு நிமிடத்துக்கு ஒன்று வீதம் வெடி பொருட்கள் வெடித்தன.

இந்த தீ விபத்து காரணமாக ராணுவ ஆயுத கிடங்கு உள்ள பகுதிகளில் தங்கியிருக்கும் 15 ஆயிரத்துக்கும் மேற்பட்டோர் வெளியேற்றப்பட்டு பாதுகாப்பான இடங்களில் தங்க வைக்கப்பட்டனர்.

மேலும் இந்த விபத்தில் உயிரிழந்தோர் குறித்த தகவல்கள் எதுவும் வெளியாகவில்லை. அதே நேரத்தில் புகை மூட்டத்தில் சிக்கி 60 பேர் மயக்கம் அடைந்தனர். அவர்களுக்கு தீவிர சிகிச்சை அளிக்கப்படுகிறது. தீ விபத்துக்கான காரணம் தெரியவில்லை. #Ukraine

திருச்சி:

காவிரி நீர்ப்பிடிப்பு பகுதிகளில் ஒரு மாதத்திற்கு மேல் நீடிக்கும் கனமழையால், கர்நாடக அணைகளில் இருந்து காவிரி ஆற்றில் வரலாறு காணாத அளவுக்கு தண்ணீர் திறக்கப்பட்டுள்ளது.

மேட்டூர் அணை 8 நாட்களாக நிரம்பிய நிலையில் உள்ளது. தற்போது வினாடிக்கு 1.75 லட்சம் கனஅடி நீர் வந்து கொண்டிருக்கிறது. அணையில் இருந்து வினாடிக்கு 1.70 லட்சம் கனஅடி நீர் திறந்து விடப்படுகிறது.

இந்த தண்ணீர் பவானி, ஈரோடு கருங்கல்பாளையம், பள்ளிபாளையம், குமாரபாளையம், மோகனூர், பரமத்தி வழியாக கரூர் மாவட்டம் மாயனூர் கதவணையை அடைகிறது. அங்கிருந்து முக்கொம்பு அணை செல்கிறது.

முக்கொம்பு அணையில் இருந்து டெல்டா பாசனத்துக்காக கல்லணைக்கும், உபரி நீர் கொள்ளிடம் ஆற்றுக்கும் திறந்து விடப்படுகிறது.

காவிரியில் பவானி சாகர் அணையில் இருந்து திறக்கப்படும் தண்ணீரும் அமராவதி ஆற்று தண்ணீரும் இணைவதால் வெள்ளம் பெருக்கெடுத்து ஓடுகிறது.

மாயனூர் கதவணைக்கு இன்று காலை 2.30 லட்சம் கன அடி தண்ணீர் வருகிறது. அந்த தண்ணீர் 83 மதகுகள் வழியாக அப்படியே காவிரி ஆற்றில் திறந்து விடப்படுகிறது. மேலும் 4 கிளை வாய்க்கால்களில் 1610 கனஅடி தண்ணீர் திறந்து விடப்பட்டுள்ளது.

முக்கொம்பு அணைக்கு இன்று காலை 8 மணி நிலவரப்படி 2.34 லட்சம் கன தண்ணீர் வருகிறது. இங்கிருந்து காவிரி ஆற்றில் கல்லணைக்கு 67,000 கனஅடி தண்ணீரும், கொள்ளிடம் ஆற்றில் 1.67 லட்சம் கனஅடி தண்ணீரும் திறந்து விடப்பட்டுள்ளது.

இதனால் காவிரி-கொள்ளிடம் ஆற்றில் வெள்ளம் சீறிப்பாய்ந்து செல்கிறது. கிளைவாய்க்கால்களில் 2 ஆயிரம் கன அடி தண்ணீர் திறந்து விடப்பட்டுள்ளது.

கல்லணையில் இருந்து டெல்டா மாவட்டங்களுக்கு காவிரியில் 9,001 கன அடியும், வெண்ணாற்றில் 1 லட்சத்து 5 ஆயிரம் கனஅடியும், கல்லணை கால்வாயில் 3,004 கனஅடியும், கொள்ளிடத்தில் 50,655 கன அடியும் தண்ணீர் திறக்கப்பட்டுள்ளது.

இந்தநிலையில் மழை நீடிப்பதால் நீர்வரத்து அதிகரித்து இன்னும் கூடுதல் தண்ணீர் திறக்க வாய்ப்புள்ளது. இன்று காவிரி ஆற்றில் 4 லட்சம் கனஅடி நீர் வரை செல்லக்கூடும் வாய்ப்பு இருப்பதால் பாதுகாப்பு முன்னெச்சரிக்கை நடவடிக்கைகளை மேற்கொள்ளுமாறு அதிகாரிகளுக்கு பேரிடர் மேலாண்மைத் துறை அமைச்சர் ஆர்.பி.உதயகுமார் உத்தரவிட்டார்.

மேலும் கரையோரத்தில் இருக்கும் பொதுமக்கள் பாதுகாப்பான இடங்களுக்கு செல்லுமாறு அறிவுறுத்தினார். இதைத் தொடர்ந்து கரூர், திருச்சி, தஞ்சை, அரியலூர் ஆகிய மாவட்டங்களில் காவிரி கரையோர பகுதிகளை கலெக்டர்கள் மற்றும் பொதுப்பணித்துறை, வருவாய்த்துறை அதிகாரிகள் பார்வையிட்டு ஆய்வு செய்து வருகின்றனர். மேலும் 24 மணிநேரமும் கரையோர பகுதிகளை அதிகாரிகள் தீவிரமாக கண்காணித்து வருகின்றனர்.

கரூர் மாவட்டத்தில் கட்டிப்பாளையம், தவிட்டுப்பாளையம், திருமுக்கூடலூர், கட்டளை, ரெங்கநாதபுரம், மேலமாயனூர், மாயனூர் ஆகிய பகுதிகளில் உள்ள கோரை, வாழை, தென்னந்தோப்புகள் வெள்ள நீரால் சூழப்பட்டுள்ளன. தொடர்ந்து காவிரி ஆற்றில் நீர்வரத்து அதிகரித்து வருவதால் வெள்ளம் வடியாமல் வயல்களிலேயே தேங்கியுள்ளது.

கரூர் மாவட்டம் என். புதூர் ஊராட்சிக்கு உள்பட்ட தவுட்டுப்பாளயம் கிராமத்தில் 150-க்கும் மேற்பட்ட வீடுகளை வெள்ளம் சூழ்ந்துள்ளது. கரையோரம் உள்ள இந்த கிராமத்தில் தண்டோரா மூலம் முன்னெச்சரிக்கை கொடுக்கப்பட்டு மக்கள் வெளியேற்றப்பட்டனர்.

சுமார் 500-க்கும் மேற்பட்டோர் உடமைகளுடன் வெளியேறினர். அவர்கள் அதே பகுதியில் உள்ள அரசு தொடக்கப்பள்ளி, சேவை மையங்கள் மற்றும் சமுதாய கூடங்களில் தங்க வைக்கப்பட்டுள்ளனர். போக்குவரத்து துறை அமைச்சர் எம்.ஆர்.விஜயபாஸ்கர், கலெக்டர் அன்பழகன் ஆகியோர் பாதிக்கப்பட்ட மக்களுக்கு நிவாரண பொருட்களை வழங்கினர்.

கரூர் அமராவதி ஆற்றின் இருகரைகளையும் தண்ணீர் தொட்டுச்செல்வதால் கரையோரம் அமைந்துள்ள திருமுக்கூடலூர், அரங்கநாதன் பேட்டை, என்.புதுப்பாளையம், அச்சமாபுரம், சோமூர் ஆகிய கிராமங்களில் நெல், சோளம், வாழை பயிர்கள் தண்ணீரில் மூழ்கின.

கட்டளை காவிரி ஆற்றின் கரைப்பகுதிகளில் அமைக்கப்பட்டுள்ள சிறிய மதகுகள் வழியாக நீர்க் கசிவு ஏற்பட்டு விவசாய நிலங்களுக்குள் வெள்ள பாயும் நிலை ஏற்பட்டது. இதையடுத்து மணல் மூட்டைகளை கொண்டு நீர்க்கசிவு பகுதிகள் சரி செய்யப்பட்டன.

கொள்ளிடம் ஆற்றில் ஏற்பட்டுள்ள வெள்ளப்பெருக்கு காரணமாக அரியலூர் மாவட்டம் தா.பழுர், திருமானூர் உள்ளிட்ட பகுதிகளில் கடும் வெள்ளப்பெருக்கு ஏற்பட்டுள்ளது


திருச்சி உத்தமர்சீலி தரை மட்ட பாலத்தில் தண்ணீர் வழிந்தோடுகிறது. அப்பகுதியில் 100 ஏக்கர் வாழை தோட்டத்தில் தண்ணீர் புகுந்துள்ளது. அப்பகுதியை அமைச்சர்கள் வெல்ல மண்டி நடராஜன், வளர்மதி, குமார் எம்.பி. மற்றும் கலெக்டர் ராசாமணி, அதிகாரிகள் பார்வையிட்டு ஆய்வு செய்தனர். திருச்சி கொள்ளிடம் பழைய பாலத்தில் 18-வது தூணில் ஏற்பட்டுள்ள விரிசல் தொடர்ந்து அதிகரித்து கொண்டே வருவதால் அப்பகுதி பாலம் தண்ணீரில் மூழ்கும் அபாயம் ஏற்பட்டுள்ளது. அப்பாலத்தை பார்வையிட்ட அமைச்சர் வெல்லமண்டி நடராஜன், கொள்ளிடத்தில் வெள்ளம் குறைந்த பிறகு பாலம் முற்றிலும் அகற்றப்படும் என்றார்.

திருச்சி மாவட்டம் லால்குடியை அடுத்த இடையாற்று மங்கலம், கூகூர், அன்பில், செங்கரையூர், டி.கள்ளிக்குடி, கே.வி.பேட்டை, ஆலங்குடி, நத்தம், நத்தமாங்குடி, திண்ணிம் ஆகிய கொள்ளிடக் கரையோரம் அமைந்துள்ள கிராமங்களின் வழியாக காவிரி தண்ணீர் பெருக்கெடுத்து ஓடுகிறது.

இங்கு கொள்ளிடம் கூழையாறு வழியாக பாய்ந்த வெள்ளநீர் வயல் பகுதிகளுக்குள் புகுந்தது. இதனால் சுமார் ஆயிரம் ஏக்கருக்கு மேல் பயிரிடப்பட்டிருந்த கதிர் வந்த நிலையில் காணப்பட்ட நெல் மற்றும் வாழை பயிர்கள் முழுவதுமாக நீரில் மூழ்கின. மேலும் கே.வி. பேட்டை, மகாஜனம், நத்தம் கிராமங்களில் 50-க்கும் மேற்பட்ட வீடுகளை வெள்ளம் சூழ்ந்தது. வீடுகளுக்குள் தண்ணீர் புகுந்ததால் அங்கு வசித்த மக்கள் அரசு பள்ளிகளில் தங்க வைக்கப்பட்டுள்ளனர்.

அரியலூர் மாவட்டம், ஜெயங்கொண்டம் அருகே கொள்ளிடம் ஆற்றில் வெள்ளம் கரைபுரண்டு ஓடுகிறது. இந்நிலையில் அங்கு கரையோர பகுதி வயலில் நிறுத்தப்பட்டிருந்த கதிர் அடிக்கும் எந்திரம் ஒன்றை மீட்பதற்காக விவசாயிகளான லட்சுமணன் (வயது 36), முத்திராபதி (33) ஆகிய 2 பேர் சென்றனர். அப்போது வெள்ளத்தில் சிக்கி கொண்டனர். உடனடியாக சுதாரித்து கொண்ட அவர்கள், வேகமாக கரைக்கு திரும்பியதால் உயிர் தப்பினர்.

இதேபோல் கோவிந்தபுத்தூர் கிராமத்தில் குள்ளன் (60) என்பவர் முயல் பிடிக்க சென்றிருந்தார். அப்போது வெள்ளத்தில் சிக்கி கொண்ட அவர், அருகில் இருந்த மரத்தை இறுக பிடித்துக்கொண்டார். இதுகுறித்து அறிந்த தீயணைப்பு துறையினர் சம்பவ இடத்திற்கு சென்று முதியவரை மீட்டு கரைக்கு கொண்டு வந்து சேர்த்தனர்.


ஸ்ரீரங்கம் பஞ்சக்கரை பகுதி கொள்ளிடம் ஆற்றில் அதிக அளவு தண்ணீர் வருவதால் பஞ்சக்கரையில் இருந்து நீரேற்று நிலையத்திற்கு செல்லும் பாலத்தின் முதல் தூண் 3 அடி மண்ணில் புதைந்தது. இதனால் நீரேற்று நிலைய மோட்டாரை இயக்க முடியாத சூழ்நிலை ஏற்பட்டுள்ளது.

எனவே திருவெறும்பூர் பகுதிக்கு உட்பட்ட திருவெறும்பூர், கூத்தப்பார், துவாக்குடி உள்ளிட்ட பகுதிகளில் உள்ள 80 ஊரக குடியிருப்புகள் மற்றும் 18 இதர அமைப்புகளுக்கு குடிநீர் வினியோகம் தற்காலிகமாக நிறுத்தி வைக்கப்பட்டுள்ளது. கொள்ளிடம் ஆற்றில் தண்ணீர் குறைந்த பின்பு தான் இவை சரிசெய்யப்படும் என்று அதிகாரிகள் தெரிவித்துள்ளனர்.

திருச்சி திருவெறும்பூர் அருகே பனையக்குறிச்சி பகுதியில் காவிரி தண்ணீர் மூலம் பாசனம் நடைபெற்று வருகிறது. இதற்காக அங்கு வடிகால் அமைக்கப்பட்டுள்ளது. அதில் 3 மதகுகள் உள்ளது. அந்த மதகுகள் நாளடைவில் பராமரிப்பின்றி இருந்தன. காவிரியில் அதிகப்படியான நீர்வரத்து இருந்ததால் மதகுகள் வழியாக வெள்ளநீர் வெளியேறின.

வெள்ளநீர் வெளியேறியதால் கரையோரத்தில் இருந்த 2 வீடுகளில் தண்ணீர் புகுந்தது. இதையடுத்து அங்கிருந்த 11 பேர் மீட்கப்பட்டு அருகில் உள்ள ஊராட்சி ஒன்றிய கட்டிடத்தில் தங்க வைக்கப்பட்டனர். வெள்ளநீர் வெளியேறும் மதகுகளில் 3 இரும்பு பிளேட்டுகளை கொண்டு அடைக்கப்பட்டது.

கரூர், திருச்சி, தஞ்சை, நாகை, திருவாரூர் ஆகிய மாவட்டங்களில் காவிரி மற்றும் கொள்ளிடத்தில் ஏற்பட்ட வெள்ளப்பெருக்கு காரணமாக 50 ஆயிரத்திற்கும் மேற்பட்டோர் வீடு மற்றும் உடமைகளை இழந்துள்ளனர். அவர்கள் ஆங்காங்கே பள்ளிகள், சமுதாய கூடங்கள், சேவை மையங்களில் அமைக்கப்பட்டுள்ள 200-க்கும் மேற்பட்ட முகாம்களில் தங்க வைக்கப்பட்டுள்ளனர்.

கொள்ளிடம் ஆற்றில் 4 லட்சம் கனஅடி வரை தண்ணீர் திறக்கப்படலாம் என்பதால் காவிரி மற்றும் கொள்ளிடக்கரையோர மக்கள் பெரும் அச்சத்தில் உள்ளனர். அவர்கள் உடனடியாக பாதுகாப்பான இடங்களுக்கு அப்புறப்படுத்தப்பட்டு வருகிறார்கள்.

நாகை மாவட்டம் சீர்காழியை அடுத்த பழையாற்றில் கொள்ளிடம் ஆற்று நீர் கடலில் சென்று கலக்கிறது. சீர்காழி அருகே உள்ள வெள்ள மணல், முதலை மேடு, நாதல்படுகை, வாடி ஆகிய 5 கிராமங்களை கொள்ளிடம் ஆற்று வெள்ளம் சூழ்ந்துள்ளது.

இப்பகுதியில் உள்ள 1000 வீடுகளை மழை நீர் சூழ்ந்துள்ளது. இது பற்றி தகவல் கிடைத்ததும் அப்பகுதியில் வசிக்கும் மக்களை மீட்டு 8 முகாம்களில் தங்க வைக்கும் பணியில் அதிகாரிகள் ஈடுபட்டு வருகின்றனர். கொள்ளிடம் அருகே மேலவாடி என்ற இடத்தில் 30 வீடுகளை வெள்ளம் சூழ்ந்துள்ளது. அங்குள்ள மக்கள் வெளியேற்றப்பட்டு வருகின்றனர். #CauveryRiver

டோக்கியோ:

ஜப்பான் நாட்டில் 1982-ம் ஆண்டு பலத்த மழை பெய்து, அதனால் ஏற்பட்ட வெள்ளத்தால் கடும் சேதம் ஏற்பட்டது.

அதேபோல் 36ஆண்டுகளுக்கு பிறகு இப்போதும் அங்கு மிக பலத்த மழை கொட்டுகிறது. இதனால் ஜப்பானில் பெரும் பகுதி வெள்ளத்தில் மூழ்கி கிடக்கிறது.

ஒகாயமா, ஹிரோஷிமா, யாமாகுச்சி பகுதிகள் கடுமையாக பாதிக்கப்பட்டுள்ளன. இதில், ஒகாயமா பகுதி முழுவதும் வெள்ளம் சூழ்ந்துள்ளது.

பெரும்பாலான இடங்களில் வீடுகளுக்குள் வெள்ளம் புகுந்து இருக்கிறது. பல வீடுகள் வெள்ளத்தில் அடித்து செல்லப்பட்டுள்ளன.

வெள்ள நிலைமை தொடர்ந்து மோசமாகி வருகிறது. பெரும்பாலான சாலைகளை வெள்ளம் அடித்து சென்று விட்டது. மேலும் பல இடங்களில் நிலச்சரிவு ஏற்பட்டும் சாலைகள் துண்டிக்கப்பட்டுள்ளன.

இதனால் போக்குவரத்து முற்றிலும் முடங்கி உள்ளது. மின் கம்பங்களும் சாய்ந்து விட்டன. இதன் காரணமாக பல பகுதிகளில் மின் இணைப்பு துண்டிக்கப்பட்டு இருக்கிறது.

வெள்ளத்தில் சிக்கியவர்களை மீட்பதற்காக மீட்பு படையினர், ராணுவத்தினர் 70 ஆயிரம் பேர் ஈடுபடுத்தப்பட்டு உள்ளனர். சாலைகள் துண்டிக்கப்பட்டு இருப்பதால் மீட்பு பணி செய்வதில் சிக்கல் ஏற்பட்டுள்ளது.

மழைக்கு இதுவரை 249 பேர் பலியாகி இருக்கிறார்கள். ஏராளமானவர்களை காணவில்லை. அவர்களும் பலியாகி இருக்கக்கூடும் என்று அஞ்சப்படுகிறது.

வெள்ள நிலைமை மிக மோசமாக இருப்பதால் பிரதமர் ஷின்சோ அபே தனது வெளிநாட்டு பயணத்தை ரத்து செய்துள்ளார். அவர், பாதிக்கப்பட்ட பகுதிகளை பார்வையிட்டு நிவாரண பணிகளை முடுக்கி விட்டுள்ளார்.  #Japanfloods #JapanRain